Резидент емес қашықтан қызмет көрсету: ККС және ҚҚС төлеу мәселесі
Қазақстандық компаниялар жиі резидент еместердің онлайн-қызметтерін пайдаланады. Бұл дизайнерлік қызметтер, кеңес беру қызметтері, жабдықты қашықтан баптау, онлайн-техқолдау және т.б. болуы мүмкін. Егер орындаушылар бүкіл жұмысты онлайн жасап, Қазақстан аумағына келмесе, мұндай жағдайда қазақстандық компания резидент еместің орнына ККС және ҚҚС төлеуі керек пе?
Салық кодексіне сілтеме
Салық кодексіне жүгінейік. ҚР СК 644-бабы 1-тармағының 2) және 3) тармақшаларына сәйкес, Қазақстан Республикасындағы көздерден резидент еместің табысы деп танылады:
- Қазақстан Республикасының аумағында жұмыстарды орындаудан, қызметтерді көрсетуден алынған табыстар;
- Қазақстан Республикасының аумағынан тыс жерлерде басқарушылық, қаржылық, кеңес беру, инжинирингтік, маркетингтік, аудиттік, заңгерлік қызметтерді көрсетуден алынған табыстар.
ККС және ҚҚС төлеу міндеттемесі
Осылайша, резидент еместің орнына ККС және ҚҚС есептеу және төлеу мәселесі тек қызметтердің көрсетілу орнына (ҚР аумағында ма немесе одан тыс жерлерде ме) ғана емес, сондай-ақ мұндай қызметтердің сипатына да байланысты.
Егер қызмет ҚР СК 644-бабы 1-тармағының 3) тармақшасында көрсетілмеген болса және ол қашықтан (яғни ҚР аумағынан тыс) көрсетілсе, онда қазақстандық компанияда салық агенті ретінде резидент еместің орнына ККС ұстау міндеттемесі туындамайды.
Егер қызметтер басқарушылық, қаржылық, кеңес беру, инжинирингтік, маркетингтік, аудиттік немесе заңгерлікке жатса, онда олардың ҚР аумағынан тыс жерде көрсетілуі де резидент еместің орнына ККС төлеуден босатпайды.
ҚҚС төлеу мәселесі
Резидент еместің орнына ҚҚС төлеуге келсек, ҚР СК 373-бабы 1-тармағында резидент емес көрсеткен жұмыстар, қызметтерді Қазақстан Республикасының салық төлеушісі алған жағдайда, егер олардың өткізу орны Қазақстан Республикасы болып табылса, бұл айналым ҚҚС салынатын айналым болып табылады деп белгіленген. Мұндай жұмыстардың құнына ҚҚС салынады.
ҚР СК 370-бабына сәйкес өткізу орны ҚР СК 378-бабына сәйкес айқындалады. ҚР СК 378-бабы 2-тармағының 2) тармақшасына сәйкес, егер жұмыстар, қызметтер қозғалмалы мүлікпен байланысты болса (монтаж, жинау, жөндеу, техникалық қызмет көрсету), онда олардың өткізу орны – жұмыстар, қызметтер фактілі орындалған орын болып танылады.
Мысалы, егер резидент емес жабдықты онлайн баптау қызметін көрсетсе, онда қызметтің өткізу орны оның елі аумағы болып саналады, демек, қазақстандық ЖШС-да резидент еместің орнына ҚҚС төлеу міндеттемесі туындамайды.