2025 жылы жеңілдетілген режимдегі жеке кәсіпкерлер (ЖК) коммерциялық жылжымайтын мүлікті жалға беріп, сол режимді қолдануды жалғастыра ала ма? Әлде олар жалпыға бірдей режимге (ОЖР) өтуі қажет пе? Түсініп көрейік...
Коммерциялық жылжымайтын мүлік — бұл тұрақты пайда алу мақсатында коммерциялық қызмет үшін пайдаланылатын кез келген жылжымайтын мүлік объектілері. Оған мыналар жатады:
- кеңсе үй-жайлары;
- сауда жылжымайтын мүлігі (дүкендер, дүңгіршектер, базарлар);
- қойма және өндірістік үй-жайлар;
- қоғамдық тамақтану және қызмет көрсету саласының нысандары;
- қонақүйлер, отельдер, хостелдер және т.б.;
- жылдам қызмет көрсету станциялары, автосервистер, көлік жуу орындары және гараждар;
- апартаменттер, тәуліктік пәтерлер.
ҚР Салық кодексіне сәйкес, арнайы режимдерді, соның ішінде жеңілдетілген режимді қолдану ҚР СК 683-бабымен реттеледі. ҚР СК 683-бабы 2-тармағының 3) тармақшасына сәйкес, мынадай қызмет түрлерімен айналысатын салық төлеушілер (ЖК, ЖШС) жеңілдетілген салық режимін қолдануға құқығы жоқ:
- сауда нарығын жалға беру және пайдалану;
- сауда нарығына жататын сауда объектілерін, 1, 2 және 3 санаттағы стационарлық сауда объектілерін, сондай-ақ олардың аумағында орналасқан сауда орындарын, сауда объектілерін және қоғамдық тамақтану объектілерін субарендаға беру;
- бір қонақүйдің немесе бөлек тұрған бейрезиденттік ғимараттың аумағында екі және одан да көп салық төлеушілердің қонақүй қызметтерін көрсету қызметі.
Сауда объектілерінің санаттары:
- 1 санат – сауда алаңы 10 000 шаршы метрден астам;
- 2 санат – сауда алаңы 2 000-нан 10 000 шаршы метрге дейін;
- 3 санат – сауда алаңы 500-ден 2 000 шаршы метрге дейін.
Осылайша, 2025 жылы сауда нарығын жалға беретін немесе сауда объектілерін субарендаға беретін салық төлеушілер жеңілдетілген режимді қолдана алмайды. Олар ОЖР-ға өтіп, 10% мөлшерлемемен жеке табыс салығын (ЖТС) есептеп, 220.00 және 200.00 нысандарын тапсыруы тиіс.
Ал басқа коммерциялық жылжымайтын мүлікті (кеңсе және т.б.) меншігінде ұстап, жалға беретін салық төлеуші 2025 жылы жеңілдетілген салық режимін қолдана алады.