2026 жылдың 1 қаңтарынан бастап ТМККК аясында әлеуметтік мәні бар 11 ауруға күдік туындаған жағдайда диагностика алу мүмкіндігі пайда болады. Бұл жаңалық сақтандырылмаған азаматтарға медициналық көмектің негізгі пакетіне қол жеткізуге мүмкіндік береді. Аурулардың қатарына туберкулез, созылмалы вирустық гепатит, бауыр циррозы, психикалық және мінез-құлық бұзылыстары, қатерлі ісіктер, жіті миокард инфарктісі, орфандық аурулар, эпилепсия, инсульт және басқа да ауыр жағдайлар кіреді.
Диагностика мен емдеу мүмкіндіктері
Бүгінгі күні ТМККК шеңберінде диагностика тек туберкулез бен АИТВ инфекциясы бойынша жүргізілсе, енді басқа әлеуметтік мәні бар ауруларды диагностикалау МӘМС жүйесінде жүзеге асырылады. Сақтандырылмаған азаматтар медициналық көмектің негізгі пакетіне кіретін бірнеше қызметтерге, соның ішінде, емханаларға алғашқы өтініш жасау, артериялық гипертензия, жүректің ишемиялық ауруы, глаукома, қант диабеті, сүт безі обыры, жатыр мойны обыры және колоректальды обырды скринингтеу және вакцинациялауға қол жеткізе алады.
МӘМС жүйесіне ауысатын аурулар
2026 жылдың 1 қаңтарынан бастап қолданыстағы 13 әлеуметтік мәні бар аурудың тізбесінен төрт ауру МӘМС жүйесіне ауысады. Олардың қатарында қант диабеті, церебральдық сал ауруы, дәнекер тіннің жүйелі зақымдануы және ревматизм бар. Бұл аурулар динамикалық бақылауға жататын жағдайлар тізбесіне енгізіліп, медициналық көмек МӘМС шеңберінде толық көлемде көрсетіледі.
Жедел медициналық көмек
Сонымен қатар, азаматтар өмірге қауіп төндіретін жағдайларда жедел және шұғыл медициналық көмек, инфекциялық аурулар кезіндегі медициналық көмек, қан препараттарымен қамтамасыз ету, паллиативтік көмек, ауыр пациенттерге ұзақ мерзімді күтім жасау сияқты қызметтерді де ала алады. Бұл шаралар азаматтардың денсаулығын қорғау және медициналық көмектің қолжетімділігін арттыру мақсатында енгізілуде.
