Бүгін Каирде пара-каратэден әлем чемпионаты өтті. Қазақстан құрамасы бұл бәсекеде 1 қола медальмен марапатталды. Ләззат Жүсіпова К10 категориясында үздік үштікке енді.
Қазақстан командасы пара-каратэден әлем чемпионатына 3 спортшыны жіберді. Олар: Ләззат Жүсіпова (K10, соқыр/көзі нашар көретін спортшылар), Назгүл Ізмағамбетова (K30, тірек-қимыл жүйесі зақымданған спортшылар) және Дидар Мұхамеджанов (K30, тірек-қимыл жүйесі зақымданған спортшылар). Ләззат Жүсіпова өз категориясында жүлдеге ие болды.
Жарыс туралы
Пара-каратэден әлем чемпионаты 2014 жылдан бері Халықаралық каратэ федерациясының (WKF) бағдарламасына енгізілген. Жарыс барысында пара спортшылар тек ката бойынша, яғни жекпе-жексіз, жекелей жаттығулар жиынтығын көрсетеді.
Бұған дейін, биыл көктемде Ташкентте өткен IV Азия чемпионатында Қазақстан құрамасы 2 алтын, 1 күміс және 4 қола медаль жеңіп алған болатын. Ләззат Жүсіпова мен Назгүл Ізмағамбетова сол чемпионатта алтын медаль иеленді, ал Дидар Мұхамеджанов қола жүлдегер атанды.