Астана қаласында Бочча спортынан Қазақстан Республикасының Кубогы өтті. Жарысқа еліміздің 15 өңірінен 120-ға жуық параспортшы қатысты. Олардың арасында Астана, Алматы, Шымкент қалалары мен Батыс Қазақстан, Атырау, Маңғыстау, Ақтөбе, Солтүстік Қазақстан, Қарағанды, Жамбыл, Түркістан, Жетісу, Павлодар, Шығыс Қазақстан және Абай облыстарының өкілдері болды.
Жарыс барысында Астана командасы екінші орынға ие болды. Марапаттау рәсіміне дене мүмкіндіктері шектеулі тұлғаларға арналған спорттық даярлау орталығы директорының орынбасары Лескен Елекеев, "Аңса" жеке қорының атқарушы директоры Мұрат Жұманбай, Қазақстан Бочча федерациясының вице-президенті Назым Жанғазинова қатысты. Олар жарысқа қатысушыларды халықаралық жарыстарға қатысу үшін ынталандырды.
Турнирдің мақсаты
Бочча Кубогының басты мақсаты — елімізде бочча спортын дамыту. Жарыс төрт күн бойы өтті. Спортшылар грамота, медаль және кубоктармен марапатталды.
Бочча — тірек-қозғалыс аппаратының бұзылыстары бар балалар мен ересектерге өзін-өзі жетілдіруге мүмкіндік беретін паралимпиадалық спорт түрлерінің бірі. Қазақстанда бочча спортын дамыту 2021 жылы басталды. Сол жылы "Қазақстан Бочча Федерациясы" республикалық қоғамдық бірлестігі құрылды.
